أصحاب أشهر قضية مرعبة حصلت في الكويت واتسببت في أزمة دبلوماسية بين بلدين
والقضية بشكل عام أدخل فيها أربع أيام
الكويت والفلبين وسوريا ولبنان وموازين القصة دي معكوسة تمام يعني الشخص اللي دايما بنتخيل أن هيكون هو الجاني في القصة دي هيكون مجني عليه
٢٠١٤سنة ده تاريخ الجريمة
لكن تم اكتشافها بعد سنة وتلات شهور من ارتكابها وعلشان نفهمها ونفهم الشخصيات اللي جوه القصة دي محتاجين نرجع سنة لورا وفي أخر القصة هقول لكم هو أنا إزاي أصلا عرفت القصة دي بتفاصيل مختلفة تماما وده فعلا حصل بالصدفة
يلا نبدأ القصة نادر شاب لبناني جميل اتولد في جنوب لبنان
وهو أبن وحيد
والده ووالدته عملوا كل حاجة علشان يطلعوا منه بني أدم كويس
من أول احتياجاته لحد التعليم
لكن في وسط ده كله نسيوا أنهم يربوه كويس أو يعلموه دينه كويس
نادر عاش معظم حياته في بيت عمته اللي ساكنة في نفس المنطقة معهم
وده كان لسبب أنه عايز أطفال حواليه
كان كاره أنه يعيش لوحده
وعلشان كده عمته وولاد عمته هم أقرب الناس له
ولما بدأ يكبر في السن شوية اكتشف حبه الكبير لمجال التجارة
في تخصص المبيعات
وكان شاطر جدا في مجال بيع الملابس والأحذية
وعنده خبرات كبيرة في الماركات العالمية وعنده خبرة كويسة في أنه أزاي يعرف يبيع أي قطعة لأي إنسان
وبسبب إهتمام والده ووالدته بالتعليم أكتر من التربية فبدأت المشاكل الحقيقية اللي لها علاقة بالتربية مع نادر من بدري شوية
فكانت علاقته بوالده ووالدته وحشة جدا
وكان بيفسر خوفهم عليه بحاجة واحدة بس
أنهم مش عايزينه ينجح ولا عايزين يشوفوه مبسوط
المهم نادر قعد يكبر في مجال المبيعات وتحديدا الملابس وخلال الوقت ده أشتغل في محلات كتير جدا وخد خبرة أكبر بكتير وفي نفس التوقيت سافر لأكتر من دولة أشتغل هناك وطبعا كان بياخد خبرات أكتر شخصية قوية وعنده قدرة كبيرة على الإقناع وكان بيستغل دايما الصفات اللي عنده دي لصالحه لكن برضه كان بيستغلها لصالح حاجات تانية غلط
وهنعرف كمان شوية كان بيستغلها في أيه
وفي بداية سنة٢٠٠٨ جات له فرصة شغل كويسة جدا في دولة الكويت
واشتغل هناك في واحدة من أشهر المحلات المتخصصة في بيع الماركات العالمية والأحذية وطبعا ده كان بمقابل كبير جدا بس في وسط النجاح الكبير اللي عمال يحققه ده كان دايما بيقنع نفسه أن السبب الرئيسي في النجاح والرزق اللي جا له هو ذكاؤه أنما أي حاجة تانية لأ وكان بيستغل ذكاؤه ده في أي تصرفات غير أخلاقية المهم أنها تجيب له فلوس زيادة
وبسبب ذكاؤه وطريقته المميزة لفت انتباه واحدة أسمها منى حسون
وهي من أصول سورية ولكنها مقيمة برضه في دولة الكويت
شغالة هناك قبل ما نادر ييجي بكام سنة ومنى حسون دي أصغر من نادر بتلات سنين وعندها نفس الصفات اللي عنده بالظبط
ذكية وشاطرة جدا وبرضو ولا لها علاقة بالدين ولا التربية
بس زود عليهم ولا الإنسانية
كانت متجوزة قبل كده من كذا سنة وانفصلت
ومنى عرفت أنها ممكن تعتمد على نادر في حاجات هي محتاجة حد فيه نفس الصفات اللي عند نادر
فتعمدت تقرب منه أكتر وقدرت في وقت قليل تخلق مساحة كبيرة من الصداقة
والصداقة دي اتحولت بعد شوية لأعجاب وحب وبعد كده اتحولت لسيطرة
برغم أن نادر شخصيته قوية و القرار لكن كان ضعيف جدا قدامها
هي اللي بتقرر وبتخطط لأي حاجة وهو شاطر جدا في التنفيذ
وبعد مرور سنة على العلاقة دي نادر يقرر أنه يتجوز منى
وفعلا يبلغ أهله في لبنان أنهم هينزلوا إجازة قريب جدا علشان يتجوزوا
ومني بلغت كمان أهلها في سوريا
نادر ومنى يوصلوا لبنان لكن يتفاجأ إن أهله رافضين الجوازة دي
وده لأكتر من سبب
أولهم أنهم مش مرتاحين لمنى خالص
وتاني حاجة أيه اللي يخليه يتجوز واحدة كانت متجوزة قبل كده
وده رأي الأهل
وكان ممكن نادر يقعد معهم ويفهم رأيهم
لكن نادر ما فكرش حتى يناقش أهله
وعمل الفرح مهما كان رأيهم
وفعلا ما حدش فيهم حضر فرح نادر
لا والده ولا والدته
وهو كمل كل حاجة عادي وقعد إجازة لمدة يومين بالظبط
وبعد كده رجعوا تاني وسافروا على الكويت ولأن دخل نادر كبير والمظهر الاجتماعي يفرق معهم هم الأتنين في أول حاجة عملها بعد ما رجع على الكويت تاني أنه قعد يدور على شقة في مكان حلو جدا وفعلا بعد شوية يلاقوا شقة متميزة في مكان راقي جدا على البحر مباشرة في منطقة السالمية بس سعر إيجار الشقة هناك هيكون غالي جدا بس ده ما كانش فارق معهم خالص لأن المظهر الاجتماعي والوجاهة الإجتماعية هتفرق كتير جدا مع أتنين بيفكروا أنهم ينصبوا على الناس وبعد ما يمر سنة على الجواز ربنا يرزق بأول مولود
وهنا منى تقرر أنها تجيب خادمة في البيت علشان تساعدها في كل حاجة
وكان الإختيار على جوانا ديما فليس اللي عندها خمسة وعشرين سنة وشاطرة جدا وامينة جدا
وجوانا ما كنتش عارفة أنها رايحة تعيش مع شياطين فعلية
جوانا من عيلة بسيطة في الفلبين ومعظم قرايبها وأخواتها بيسافروا لدول عربية علشان يشتغلوا خادمات في البيوت
لكن طبعا البيوت العربية بتحترمهم جدا
المهم أن نادر يبقى الكفيل بتاع جوانا في الكويت
وطبعا تنقل حياتها علشان تعيش معهم في الشقة الفارهة والكبيرة جدا
وخلال السنة دي كانت العلاقة بين جوانا وبين منى سيئة جدا
منى كانت على طول بتتخانق معها
وكان كتير جدا الموضوع بيوصل للضرب
ده غير الإهانة اللي كانت بتحصل كل شوية
فواضح أن منى كانت مستكترة الفلوس اللي كانت بتديها لجوانا ولأن جوانا كانت فعلا طيبة جدا فكانت بتخاف تشتكي لأي حد
وده لأنها كانت خايفة تمشي من عندهم وما تلاقيش شغل أو خايفة أنها تمشي من الكويت خالص
وده التهديد اللي كانت دايما منى بتقوله لها
وخلال الوقت ده كان نادر أحيانا بيتأخر في دفع دفع الإيجار لصاحب الشقة بس الراجل كان بيسكت وبيسامح على اعتبار أنه مقدر الظروف المادية
تحديدا أن نادر لو كان أتأخر كان ممكن يدفع الإيجار في نص الشهر
وفي أخر سنة ٢٠١٢والدة نادر تقرر أنها ترجع العلاقات مع إبنها تاني
وهو يتبسط ويقول لها أنه عازمها في الكويت تيجي تقعد عندهم أسبوعين إجازة وتغير جو
وفعلا والدته تسافر له وهي مبسوطة جدا
بس أول ما يعدي يومين بس من وصولها للكويت منى تتخانق معها خناقة كبيرة وتطردها برة البيت
يقوم نادر يأخد والدته ويطلع على أقرب مكتب سفر ويحجز تذكرة طيران لبيروت ويرجع والدته تاني على لبنان
ويقول لها أنه ما يقدرش يزعل منى ولا يقدر يعيش من غيرها
وزي ما قلنا التربية والدين ما لهمش مكان في حياته خالص
ومن وقتها العلاقات اللي بين والده ووالدته اتقطعت تماما
وهو ما كانش فارق معه
وفي نفس الوقت ده جوانا كانت دايما بتعاني من الضرب والتهديد والتعذيب المستمر
وكأنها فعلا عايشة في وسط شياطين
المهم تمر سنة وجوانا قاعدة بتنضف في البيت تكسر قطعة اكسسوار بس مهمة جدا عند منى
فمنى تتضايق إزاي تعمل كده وتقرر أنها هتضربها بس المرة دي الضرب كان زيادة وجامد جدا
ومن هنا كانت النهاية وبعد ما يمر يومين نادر ينزل ويطلع على قسم الشرطة ويعمل بلاغ أن جوانا هربت من في البيت وأن ما لهاش أي أثر وأنه مش عارف يوصل لها خالص
وبكده في القانون الخاص بالعاملين جوانا تعتبر مخالفة ولازم يتقبض عليها
جوانا بشكل عام كانت بتتواصل مع أهلها مرة أو مرتين بس في السنة
وده اللي خلى أهلها ما يحسوش أنها مش موجودة أو مش بتسأل عنهم خالص
المهم تعدي سنة كاملة ونوصل لأخر سنة ٢٠١٥
ونادر ومنى عليهم أكتر من بلاغ نصب وكتابة شيكات بدون رصيد
وفجأة هم الأتنين يختفوا تماما من الكويت
وعربية نادر الشخصية مركونة تحت البيت زي ما هي
ومالك الشقة بقى له تلات شهور كاملين ما بياخدش الإيجار
وكل شوية يروح على البيت ويخبط على الباب ما فيش أي حد بيفتح مع أنه شايف عربية نادر مركونة تحت البيت
بس بعد ما يعدي تلات شهور كاملين والايجار ما بيتدفعش خالص وكل الجيران بتقول أنهم ولا بيشوفوا منى ولا بيشوفوا نادر كمان يلاحظ إن العربية بتاعة نادر واضح أنها متحركتش خالص من مكانها وعليها كمية تراب كبيرة جدا فيتحرك مالك الشقة على المحكمة ويرفع قضية علشان يتمكن من الشقة بتاعته
وده لأنهم ما بيدفعوش الإيجار
وبعد ما يمر تلات شهور كمان المحكمة تحكم لمالك الشقة بأنه يتمكن منها ويروح يستلمها
فتتحرك قوة أمنية مع ما لك الشقة على المكان هناك
وده علشان يكسروا الباب
والراجل يستلم الشقة بتاعته بس يلاقوا أن الباب مقفول بكمية اقفال كتيرة جدا وكأن في حد متعمد ان الباب ده ما يتفتحش خالص
المهم بعد شوية يكسروا باب الشقة ويدخلوا جوة
واللي يلاقوا أنه واضح جدا أن ما فيش أى حد دخل الشقة دي من فترة طويلة
كل اللي يلاقوه في الشقة ديب فريزر شغال
بس لما يقربوا من الديب فريزر ويفتحوه يتصدموا من المنظر اللي جواه
جثة مجمدة بالكامل وشكلها مرعب جدا
يطلب رجال الأمن مباشرة نقل الجثة على الطب الشرعي لتحديد هوية الجثة دي بتاعت وبعد مطابقة بصمات الجثة يكتشف رجال الأمن أن الجثة دي بتاعة جوانا الخادمة الفلبينية اللي نادر عمل بلاغ بأنها هربت من الشقة وتقرير الطب الشرعي يوصف طريقة الوفاة وسبب الوفاة والأهم أن بيثبت زمن الوفاة
جوانا ميتة من أكتر من سنة وتلات شهور
ده غير ضرب على الرأس بآلة حادة
وكمية تعذيب موجودة وواضحة على كل حتة في جسمها
والأهم أن سبب الوفاة مش كل ده
سبب الوفاة هو التجمد
وبيتقال في التقرير إن الجثة اتحطت جو ه الفريزر وهي عايشة وأنها ماتت بسبب برودة الجو
ورجال الأمن لقوا الجثة جوة الديب فريزر كانت مربوطة من ايديها ومن رجليها
يعني حد متعمد يشل حركتها علشان ما تخرجش من الديب فريزر
وطبعا الأتهام يروح بشكل مباشر لنادر ومنى، واللي تعرفه السلطات اللي في الكويت أن نادر ومنى هربوا من تلات شهور، وهم الأتنين سافروا على لبنان وبعدها راحوا على سوريا
يعني الأتنين عاشوا ومعهم ولادهم في الشقة دي والجثة موجودة في الديب فريزر لمدة سنة كاملة
وبمجرد ما يتم إعلان ده لوسائل الاعلام تحصل أزمة دبلوماسية كبيرة بين الفلبين وبين الكويت
السلطات في دولة الكويت تخاطب الإنتربول الدولي علشان يتم القبض على نادر وعلى منى
ويتم ترحيلهم للكويت علشان يتحاكموا هناك
ويتم مخاطبة دولة لبنان ودولة سوريا
علشان يقبضوا عليهم هم الأتنين ويتم ترحيلهم على دولة الكويت
وفعلا رجال الأمن يعرفوا إن نادر هربان في سوريا وقاعد مع مراته
فيتم القبض عليه في سوريا وترحيله للبنان
وفي نفس الوقت يتم القبض على منى في سوريا
وأول ما نادر اتقبض عليه أعترف على طول لرجال الأمن كل حاجة
حقيقي اعترافات مرعبة جدا
لما جوانا وهي بتنضف البيت وكسرت قطعة الاكسسوار الغالية على منى
فمنى مسكت الجزء المكسور وضربتها جامد على راسها
وفي الوقت ده جوانا وقعت على الأرض وفقدت الوعي
ومنى ما اكتفتش بكده
فضلت تضرب فيها وتعذبها بكل الطرق اللي تقدر عليها أو ما تقدرش
ولسه جوانا كانت عايشة
فلما نادر يرجع البيت يلاقي أنه كده هيلبسوا قضايا جديدة أكبر وأكتر من القضايا اللي عندهم
فيقرر أنه يتخلص منها علشان ما تنزلش بعد كده وتعمل بلاغ فيهم فيربط ايديها ورجليها ويفتح الديب فريزر ويفضيه من كل حاجة ويحطها جوة الديب فريزر وهي عايشة
ونادر بيقول في الأعترافات أنه كان عارف وهو بيحط جوانا جوة الديب فريزر أنها عايشة
وقرروا هم الأتنين أنهم هيكملوا حياتهم عادي
بس المهم أن هو ينزل ويعمل بلاغ بأنها هربت وبعد كده هم يقعدوا عادي
ويقعدوا فعلا لمدة سنة كاملة والبنت محطوطة جوة الفريزر وميتة وهم مش فارق معهم
بس لما تبدأ تيجي لهم معلومات إن في بلاغات هتبدأ تتحرك ضدهم بقضايا نصب وشيكات بدون رصيد هم الأتنين يقرروا إنهم يهربوا من الكويت ويطلعوا على لبنان أو على سوريا
ويتحكم عليهم هم الأتنين في دولة الكويت غيابيا بالإعدام
وفي نفس التوقيت دولة الفلبين بتطالب أن هم الأتنين يسافروا عندها علشان يتحاكموا هناك
لأن رئيس الفلبين رفض تمامآ أن محاكمة منى ونادر تكون خارج أرض الفلبين
وتحصل أزمة دبلوماسية حقيقية بين البلدين
لكن طبعا العقلاء اللي في كل دولة سيطروا على الوضع وحلوا الأمور اللي بينهم
إزاي بقى إنا اتحكى لي الموضوع ووصل لي بالصدفة قاعد مع صديق مقيم طول عمره في الكويت
فكان بيحكي لي عن حاجة غريبة جدا حصلت معه
أنه قعد في شقة في حتة راقية جدا في الكويت وعلى البحر مباشرة
وكان واخد الشقة دي إيجار بسعر لقطة جدا
سعر أقل بكتير من قيمتها الحقيقية
وهو كان متعود يحلق في صالون حلاقة بعيد جدا عن مكان الشقة دي
لكن بعد ما قعد في المكان الجديد ده لمدة سنة أو أكثر قرر أنه عايز يحلق شعره تحت البيت على طول
لأن كان فيه صالون حلاقة وهو عمره ما جربه
فلما دخل عند الراجل وقعد عنده فصاحب صالون الحلاقة أول مرة يشوفه فبيتعرف عليه وبيدردشوا مع بعض
فبيعرف منه هو ساكن فين بالظبط
فصديقي ده لما وصف له هو ساكن فين? فقال له آه أنت قاعد في شقة نادر اللي ما فيش حد بيقعد فيها خالص
فكان أول مرة يعرف أنه قعد في الشقة دي لمدة سنة وأكتر
مبسوط بها جدا وان كان فيها جثة موجودة في الفريزر لمدة سنة وتلات شهور
وعرف ليه إن إيجار الشقة دي كان أقل من قيمتها الحقيقية
وقرر في نفس الوقت أنه هيسيب الشقة دي لأنه مش هيقدر يقعد فيها بعد كده
نرجع بقى علشان نختم قصة نادر ومنى
أهم حاجة نعملها مع ولادنا جنب أن احنا نعلمهم ونجيب لهم لبس وهدوم ونخرجهم هو أننا نربيهم كويس ونعرفهم دينهم كويس
لان هو ده اللي هيصلح حالهم بعد كده في كل حاجة