حسني مبارك رئيس لجنة تحقيق قاعدة أنشاص
بعد نكسة سبعة وستين قررت القيادة في مصر أنها تعين اللواء حسني مبارك رئيس للجنة التحقيق العسكرية اللي هتحقق في فضيحة قاعدة أنشاص الجوية قاعدة أنشاص اللي أتقال وقتها اللي أن أتعمل فيها حفلة خمسة يونيو وحضرت فيها فنانات فضلوا سهرانين للصبح مع الطيارين والمفروض أن ده كان السبب الرئيسي في أن الطيارين يشربوا ويسهروا للصبح وبالتالي ما كانش عندهم أي إستعداد لمواجهة أي هجمات محتملة من الجيش الإسرائيلي ده اللي اتقال وقتها والمفروض اللواء حسني مبارك تولى مهمة التحقيق فيه المهم اللواء حسني مبارك هو وأعضاء لجنة التحقيق بدأوا يستقبلوا الطيارين والفنانات اللي شاركوا في الحفلة دي علشان يحققوا مع كل طيار ورا التاني
فنانة ورا التانية وما فيش أي حاجة غريبة أو ملفتة للنظر حصلت في الحفلة تخلي لجنة التحقيق تتهم حد بحاجة
كلام حسني مبارك والفنانة
لحد ما قعدت واحدة من الفنانات قدام اللواء حسني مبارك وسألها إيه حصل في الحفلة يا فنانة قالت: له بقول لك إيه الحفلة ما حصلش فيها أي حاجة حفلة زي أي حفلة من الحفلات اللي ماليين البلد لو عاوز تعرف بجد سبب النكسة أسأل قائد القاعدة الجوية في بني سويف
فسألها اللواء حسني مبارك أسأله عن إيه ؟
هنا الفنانة حست أنها أتسرعت في طريقة كلامها خصوصا أنها ذكرت قائد قاعدة جوية بالأسم فاللواء حسني مبارك لما حس أنها خافت طمنها وقال لها قولي كل اللي تعرفيه وما تخافيش من أي حاجة قالت له بكل بساطة سبب النكسة الحقيقي هو قيادات البلد والجيش واللي من بينهم قائد القاعدة الجوية في بني سويف اللي ساب قاعدته الجوية ليلة خمسة يونيو وبات في شقة مفروشة برة القاعدة ولما صحي على صوت الصواريخ والإنفجارات طلع يجري عريان في الشارع وهو مرعوب لحد ما الشرطة العسكرية جت خدته في عربية جيب من وسط الناس اللي اتلموا حواليه في الشارع علشان يداروا فضيحته فبكل هدوء سألها اللواء حسني مبارك أنت شفت الواقعة دي بنفسك؟
قالت له لأ ما شفتهاش لكن كل أهالي بني سويف شافوها وبيحكوها لبعض لحد ما مصر كلها عرفتها أنتم بس اللي مش عايزين تصدقوا قال لها لكن سجلات الطيران بتقول أن قائد قاعدة بني سويف الجوية وتحديدا يوم خمسة يونيو الصبح اللي هو يوم النكسة كان طاير مع خمسة طيارين تانيين على طيارات قاذفة في طلعة تدريبية وكمان السجلات بتقول أن هجمات الطيران الإسرائيلية حصلت بعد ما طلع مع الخمس طيارين بخمس دقايق بس لدرجة أنه ما قدرش يرجع مطار بني سويف تاني بطياراته لأن ممرات المطار كانت انضربت وأضطر أنه يكمل لحد مطار الأقصر علشان ينزل هناك وحتى بعد ما نزل في الأقصر بدقايق حصل هجوم على المطار وانضربت طياراته وطيارات رجالته اللي معه فإيه رأيك في الكلام ده يا فنانة؟
الفنانة حطت رجل على رجل وقالت له بكل بساطة هو أنت بتصدق الكلام ده ؟
السجلات سجلاتنا والورق ورقنا أكيد كتبوا كده علشان يداروا على فضيحته فاللواء حسني مبارك ضحك وقال لها طيب إيه رأيك يا فنانة أن أنا قائد القاعدة الجوية في بني سويف هو قال الجملة دي من هنا وكل أعضاء لجنة التحقيق ضحكوا من هنا إلا الفنانة هي الوحيدة اللي وشها قلب ميت لون وما كانتش مصدقة أنها قاعدة قدام قائد القاعدة الجوية اللي اتهمته من دقايق بأنه كان بيجري عريان في الشوارع مجرد ما الحرب قامت دي كانت الحرب النفسية اللي بدأتها إسرائيل ضد مصر والجيش المصري بعد نكسة سبعة وستين حرب الشائعات كل اللي حكيته لك ده كان جزء من مذكرات الرئيس حسني مبارك واللي اتنشرت من فترة واللي هحكي لك تفاصيلها دلوقتي باذن الله
شهادة مبارك عن أحداث النكسة
بيكمل الرئيس الراحل مبارك وبيقول يوم خمسة يونيو الصبح تحديدا الساعة تسعة وربع طرت أنا وخمسة طيارين في طلعة تدريبية بالقاذفات التقيلة وبعد خمس دقايق بالظبط من الإقلاع لقينا لاسلكي الطيارات بيترج زمايلنا في اللاسلكي بيقولوا لنا أن المطار بيتضرب قاعدة بني سويف الجوية اللي لسة طايرين منها من خمس دقايق بس بتضرب بالطيران وده معناه إنه كل القاذفات التقيلة اللي تحت في المطار انضربت بالبلدي كده سلاح الجو المصري خسر القاذفات التقيلة لكن ما كانتش دي المشكلة آمال إيه المشكلة؟
مذاكرات مبارك عن يوم النكسة
الرئيس مبارك بيقول في مذكراته أن بداية الهجوم الجوي الإسرائيلي بدأ قبل ضرب قاعدة بني سويف بخمسة وتلاتين دقيقة كاملة وهنا السؤال لما الهجوم بقى له أكتر من نص ساعة مركز العمليات ما بلغش قادة المطارات ليه في لحظتها؟
ما بلغش باقي مطارات الجمهورية ليه؟ على الأقل بدل ما كنت هطلع في جولة تدريبية بخمس طيارين بس كنت هطلع كل الطيارين بكل الطيارات اللي على الأرض وبدل ما كانت تبقى طالعة تدريبية كنت إشتبك أو على الأقل خالص أنقل القاذفات بتاعتي لمكان أمن بعيد عن الهجمات لو كل المطارات أتبلغت لحظة بداية الهجوم كان زمان كل قادة المطارات قدروا يطلعوا الطيارين في الجو بطياراتهم وبالتالي نتيجة المعركة تتغير بالكامل كان ممكن يتم امتصاص الضربة الأولى ويقدر الطيارين المصري أنهم ينفذوا ضربة مضادة وتتغير نتيجة الحرب بالكامل خصوصا وأن أنت كنت ناقل أصلا قوتك البرية ل سينا ومتمركزين في وضع الهجوم لو أنتم فاكرين لما الرئيس عبدالناصر قال إنه هيرمي إسرائيل في البحر وبعت القوات المصرية تتمركز في سينا إستعداد للهجوم يعني لو الطيران المصري وطيارات كانوا طلعوا في الجو قبل ما ينضربوا كان ممكن ينفذوا ضربات مضادة والقوات البرية الموجودة أصلا في سينا تتحرك تحت الغطاء الجوي ده ومصر والأردن وسوريا هم اللي ينتصروا مش العكس لكن ده ما حصلش قاعدة بني سويف الجوية ما تبلغتش أصلا بالهجوم الجو الإسرائيلي الطيارين المصريين في قاعدة بني سويف عرفوا أن الحرب قامت لما مطارهم انضرب بعد خمسة وتلاتين دقيقة من بداية الحرب طيب ده معناه ايه؟
تحليل مبارك لأحداث ضرب المطارات
معناه ودي النتيجة اللي خمنها اللواء حسني مبارك في الجو أن مطارات سينا والدلتا والقاهرة انضربت الأول وده معناه برضه أن مطارات الجنوب لسة ما انضربتش وبالتالي هي المكان الوحيد اللي ممكن ينزل فيه مع الطيارين الخمسة اللي معه لكن المفاجأة اللي كانت مستنياهم هناك أنهم لما نزلوا المطار علشان يتم تزويد الطيارات بالوقود والتسليح فوجئوا بأن المطار ما فيهوش المعدات اللي بيتم استخدامها للتزود بالوقود وطبعا ما فيهوش ذخيرة علشان يتم تسليح وفي وسط ما هم واقفين بيدوروا على أي حاجة يستخدموها علشان يملوا خزانات الطيارات بالوقود وبيتواصلوا مع مركز القيادة علشان يبعتوا لهم ذخيرة سمعوا صوت انفجارات برة في مهبط الطيارات طلعوا جري يشوفوا إيه اللي بيحصل لقيوا طياراتهم بتتحرق على الأرض سلاح الجو الإسرائيلي ضرب مطار الأقصر الطيارات اللي فيه واللي من بينها القاذفات بتاعتهم في اللحظة دي أي حد من الجيل اللي ما حضرش كواليس نكسة سبعة وستين هيقول أن اللي حصل ده أكبر دليل على تفوق سلاح الجو الإسرائيلي اللي وجه ضربات مركزة لسلاح الجو المصري وضرب طياراته على الأرض حتى قبل ما تطير
أسرار معرفة اسرائيل أماكن المطارات بالظبط
لكن في المذكرات يكشف الرئيس مبارك أو اللواء حسني مبارك وقتها شوية تفاصيل ناس قليلة بس اللي يعرفوها منها مثلا إجابة سؤال مهم وهو أزاي مخابرات سلاح الجو الاسرائيلي قدرت تحدد خرايط المطارات المصرية بالدقة اللي مكنتها أنها تشل سلاح الجو المصري في ساعتين ؟
الإجابة بكل بساطة زي ما نشر اللواء حسني مبارك في مذكراته هي أن دي نفس المطارات اللي كان بيستخدمها سلاح الجو البريطاني قبل الجلاء سنة أربعة وخمسين وهي نفس المطارات اللي ضربها سلاح الجو البريطاني في عدوان ستة وخمسين تخيل معي كده طيار بيضرب المطار اللي كان كل يوم بيطير منه وبيرجع له أكيد هيضربه وهو مغمض
حضرتك هتقول لي ثانية واحدة إيه علاقة سلاح الجو البريطاني بنكسة سبعة وستين؟
علاقة سلاح الجو البريطاني بنكسة ٦٧
هاقول لك أو اللواء حسني مبارك هو اللي هيقول لك عدوان ستة وخمسين إشترك فيه سلاح الجو الإسرائيلي مع فرنسا وبريطانيا وبالتالي درس كويس الأهداف اللي هيتم ضربها اللي هي المطارات يعني ومش بس درسها نظريا ده كمان طبق عملي في تنفيذ الهجمات في عدوان ٥٦ يعني كانت بروفة ببلاش
الطيار الأسرائيلي عزرأويزمان.
الأخطر من كده أن كان من بين الطيارين اللي إشتغلوا في المطارات المصرية وقت إحتلالها من الإنجليز ظابط طيار إسمه عزرأويزمان طيب إيه اهمية عزرا رويزمان ده ؟
أقول لك أهميته كبيرة اقولك مثلا أنه إسرائيلي مش بريطاني ثانيا أنه تولى بعد قيادة سلاح الجو الإسرائيلي من ١٩٥٨ل ١٩٦٦ يعني لو حرب النكسة كانت في٦٧ فده معناه أن الراجل ده هو اللي تولى مهمة التخطيط للضربة الجوية الإسرائيلية في٦/٥/ ١٩٦٧/ واللي كان أسمها بالمناسبة (طوق الحمامة) ده غير أنه لما ساب سلاح الجو سنة ستة وستين ما قعدش في بيتهم ده اترقى لمنصب رئيس عمليات الجيش الإسرائيلي كله اللي
هو بالبلدي كده علشان اللي ما خدش باله من حضراتكم الراجل ده خدم في المطارات المصرية وقت الإحتلال الإنجليزي لمصر يعني عارف المطارات المصرية شبر شبر ولما مشي مع القوات البريطانية وقت الجلاء عن مصر ما خرجش بايده فاضية ده خد معه خرايط المطارات المصرية وتفاصيل كل منشآتها وطلع بهم على فين ؟
على إسرائيل تولى هناك قيادة سلاح الجو الإسرائيلي وفرد لهم خرايط المطارات المصرية وقال لهم هنضرب هنا وهنا وهنا بس كده ؟ طبعا لأ ده أدى لهم كمان المسارات اللي ما فيهاش تركيز لردارات الدفاع الجوي المصري خد بالك في معلومة مهمة جدا لكن للأسف غايبة عن مصريين كتير من بينهم قادة الجيش المصري نفسهم قبل نكسة ٦٧ وده بالمناسبة وفقا لمذكرات اللواء حسني مبارك مش كلامي أنا
مساحة مصر تقريبا نص مليون ميل حضرتك تقول لي يعني حسني مبارك جاب التايهة يعني ما كلنا عارفين إن مساحة مصر نص مليون ميل أقول لك اتقل بس أقرأ للأخر من بين الأخطاء اللي وقع فيها قادة الجيش المصري قبل نكسة ٦٧ هي أنهم كانوا بيقارنوا تجهيز الجيش المصري بالجيش الإسرائيلي وفقا للعدد فيقول لك مثلا إحنا عندنا طيارات أكتر من طيارات الجيش الإسرائيلي وعندنا رادارات دفاع جو أكتر من رادارات الجيش الإسرائيلي وعندنا عساكر أكتر من عساكر الجيش الإسرائيلي وهكذا
وطبعا المقارنة دي غلط ليه ؟ لانهم بنوا المقارنة على الكم مش الكيف يعني ايه برضه؟ يعني إسرائيل مثلا عندها عشر طيارات مثلا يعني ومصر عندها ميت طيارة لكن السؤال هنا هل كفاءة الطيارات دي متساوية؟
هل سرعتهم واحدة؟
هل مدد طيرانهم واحد؟
هل تسليحهم واحد؟
الاجابة طبعا لأ الطيارات الإسرائيلية أحدث بكتير من الطيارات المصرية وبالتالي ما ينفعش أقول ده أنا عندي طيارات أكتر منه وبالتالي أنا أقوى منه ده اسمه كلام فارغ، وقس المثال ده على رادارات الدفاع الجوي أنت مساحة بلدك المطلوب تأمينها نص مليون ميل ودي مساحة ضخمة جدا في حين أن مساحة اسرائيل أو فلسطين المحتلة أقل بكتير منك وبالتالي عدد الرادارات اللي أنت محتاجها علشان تأمن النص مليون ميل لازم يكون أضعاف أضعاف الرادارات اللي هو محتاجها لكن للأسف كانت كل التقارير اللي بيرفعها قادة الجيش المصري للقيادة السياسية بتقول أن عندنا طيارات أكتر منهم ورادارات أكتر منهم وعساكر أكتر
كلمة صعبة جدا من مبارك فى مذكراته
طيب هم قادة الجيش المصري ما كانوش فاهمين الكلام ده؟ الإجابة طبعا لأ كانوا فاهم فاهمين كل حاجة طبعا لكن وفقا لمذكرات اللواء حسني مبارك كلهم كانوا بيكتبوا أن كل شيء تمام علشان يحافظوا على كراسيهم وأماكنهم
الكلام الأخطر فى المذكرات
الأخطر من كده أن قيادات الجيش وتحديدا سلاح الجو المصري كانوا لسه عايشين على النظريات القديمة نظريات الحرب العالمية اللي هو عدوك لو حب يهاجمك فالهجوم مش هيتم إلا بعد الفجر مباشرة مع أول ضوء يعني ليه؟ علشان السما بتكون صافية والرؤية المتاحة للطيارين بتكون قوية جدا إنما قبل كده أو بعد كده فالدنيا أمان ما تخافش من أي حاجة ما حدش هيقرب لك فبيقول اللواء حسني مبارك أن القيادات نسيت أن الدنيا اتطورت والطيارات الحديثة تزويدها بأجهزة تساعد الطيارين مش بس على الطيران لكن كمان على تحديد الهدف واصابته يعني الطيار الإسرائيلي بطيارته الحديثة ما كانش محتاج يبذل نفس المجهود اللي بيذله الطيار المصري في التنشين على الهدف فكانت الكارثة يوم خمسة يونيو أن مع أول ضوء بعد الفجر اللي هو أخطر توقيت وفقا للنظرية وقتها طلعت طيارات مصرية تأمن السما بيعملوا حاجة اسمها مظلة حماية أو مظلة تأمين تطلع الطيارات تتأكد أن السما ما فيهاش أي طيران معادي أو تبقى موجودة في الجو علشان لو حصل أي هجوم جوي تبقى طيارتنا فعليا موجودة فوق مش لسه هتطير من الأرض اللي حصل بقى يومها أن الطيارات المصرية طلعت وفضلت طايرة لحد ما أطمنوا أنه تمام وقت الخطر أنتهى فنزلت الطيارات تاني للمطارات
الطيارين المصريين نزلوا من هنا وهوب الطيران الإسرائيلي طلع وراهم يضرب المطارات المصرية وواحد ورا التاني حضرتك تقول لي طيب مش المفروض أن فيه حاجة أسمها دوشم للطيارات المفروض الطيارات تبات فيها علشان لو حصل أي هجوم جوي الدوشم هي اللي تنضرب وتفضل الطيارات تحتها سليمة أقول لك عندك حق لكن المفاجأة أن سلاح الجو المصري لما طلب من القيادة السياسية توفر ميزانية علشان يبنوا دوشم للطيارات بدل ما تقف في الخلا منها للسما ردت القيادة السياسية وقتها بأن ما فيش ميزانية علشان نبني دوشم من الطيارات والكلام ده شرحناه بالتفصيل في مقال نكسة سبعة وستين للي حابب يعرف الحكاية من أولها
ونجاح الهجوم الجوي الإسرائيلي في ضرب سلاح الجو المصري لكن السؤال هو ايه بالظبط اللي انضرب في سلاح الجو المصري؟
أقول لك الله ينور عليك هو ده السؤال الصح الإعلام الإسرائيلي يروج أنه تضرب كل الطيارات المصرية على الأرض وده مش حقيقي عدد كبير من الطيارات المصرية فضل سليم وهنا حضرتك تسأل سؤال بديهي لما كان فيه طيارات مصرية سليمة ما طلعتش تشتبك مع الطيران الإسرائيلي في الجو ليه ؟
ضرب المطارات بقنابل الممرات
اللواء حسني مبارك ذكر مذكراته أن أخطر ضربة وجهها سلاح الطيران الإسرائيلي ما كانتش للطيران المصرية لكن لممرات المطارات المصرية الممرات اللي بتقلع وتهبط عليها الطيارات هي اللي انضربت مش بس كده الأخطر أنها انضربت بنوع جديد من القنابل اسرائيل طورته مخصوص لحرب سبعة وستين واسمها قنبلة الممرات والقوى التدميرية لقنبلة الممرات دي بتقدر تاكل جزء كبير الممر لعمق كبير ومساحات واسعة وبالتالي حتى لو فيه طيارات فضلت سليمة على الأرض ما بتقدرش تطير وهو ده المطلوب اللي ما تقدرش تضربه كتفه لكن خد بالك معلومة كده على جنب هنحتاج لها كمان شوية مش كل المطارات والطيارات والممرات ادمروا في الضربة الجوية الإسرائيلية برغم كل الخساير كان لسة فيه مطارات وممرات وطيارات سليمة وصالحة للاستخدام صحيح عددهم مش كبير لكن كان فيه وهنا ملاحظة مهمة هو اللي حصل ده شطارة وعبقرية من سلاح الجو الإسرائيلي ولا لأ؟
بيرد على السؤال ده اللواء حسني مبارك وبيقول بالعكس ده كان غباء ليه؟
لان سلاح الطيران الإسرائيلي بكل ما يمتلكه من خرائط ومعلومات عن منشآت المطارات المصرية اللي اتكلمنا عنها كان يقدر مش بس يستهدف الطيارات والممرات ده كان يقدر يستهدف اللي أخطر منهم الطيارين المصريين اللي هو حسني مبارك بيقول في مذكراته سلاح الجو الإسرائيلي كان عنده القدرة لو ركز أنه يضرب الطيارين المصريين نفسهم وده لو كان حصل كان الجيش المصري هيحتاج سنين وسنين علشان يبني سلاح طيران من جديد حتى لو الطيارات والممرات فضلت سليمة لأن أنت خلاص ما عدش عندك طائرين مين اللي هيطير بالطيارات طيب هل الكلام ده حقيقي ولا اللواء حسني مبارك بيقول أي كلام تعال نعرف
بطولات الطيار سعيد شلش والطيار فتحي سليم
هو نفسه اللواء حسني مبارك بيحكي في المذكرات عن عمليات جوية نفذها طيارين مصريين في نفس يوم الهجمات الجوية الإسرائيلية اللي هو خمسة يونيو وما تلى خمسة يونيو من أيام فمثلا يوم خمسة يونيو الصبح وبعد ما نزل الطيارات مظلة الحماية المصرية اللي اتكلمنا عنها في اول المقالة بدأ هجوم الطيران الإسرائيلي على مطار فايد فما كان من الرائد طيار محمد سعيد شلش وزميله النقيب طيار فتحي سليم إلا أنهم طلعوا جري على طياراتهم الميكس تسعتاشر واشتبكوا مع الطيران الإسرائيلي مش بس يوم خمسة يونيو ده كمان رجعوا بطياراتهم سليمة وكملوا اشتباكات تاني يوم ستة يونيو حضرتك تقول لي وإيه يعني رجعوا سالمين يعني؟ يا فرحتي وقعوا كم طيارة يعني؟ ولا إيه الإنجاز اللي عملوه؟
أقول لك دول أتنين طيارين طلعوا بطياراتهم في السما بدون خطة بدون دعم بدون حماية علشان يقفوا في وش اسراب من الطيارات الإسرائيلية اللي تم تسليحها باحد ث الصواريخ في العالم لا فكروا هيعيشوا ولا هيموتوا لا فكروا معهم دعم ولا ما معهمش ولا حتى سألوا نفسهم أزاي هيواجهوا كل الطيارات دي لوحدهم كل اللي فكروا فيه أن البلد بتضرب وطياراتنا لسة سليمة فجريوا على طياراتهم دوروها وطاروا يدوروا على الموت لكن لو فارق معك اذا كانوا وقعوا طيارات ولا لأ فما تزعلش نفسك تالت يوم الحرب اللي هو سبعة يونيو جات لهم أوامر من القيادة اللي هم أنهم يطلعوا فورا ينفذوا طلعة اعتراضية خير إيه اللي بيحصل؟
قال لك سلاح الجو الاسرائيلي بينفذ عمليات إسقاط مظليين في منطقة الممر في سينا لكن مش دي المشكلة
المشكلة أن الطيارات اللي بتنفذ إنزال للمظليين معها مظلة حماية من طيارات الميراج اللي كانت بتعتبر من أحدث الطيارات وقتها طيب إيه المطلوب برضه؟ أطلع يا شلش أنت وسليم لموا لي شوية العيال دول طبعا السؤال اللي لازم يتبادر لذهنك دلوقتي هو نلم وعيال ايه ؟ هم طالعين يقبضوا على حرامي غسيل؟ دول أتنين طيارين لا حول لهم ولا قوة مطلوب منهم يعترضوا مظلة حماية وتأمين مكونة طيارات ميراج لكن عارف عملوا إيه الإتنين طيارين المصريين اللي لا حول لهم ولا قوة دول ؟ نفذوا الأمر وخدوا طياراتهم وطلعوا
الرائد شلش طيارة نقل بحمولتها كاملة من المظليين ولف ضرب طيارة ميراج من طيارات التأمين اما النقيب فتحي سليم فوقع تلات طيارات أتنين نقل بالمظليين اللي جواهم والتالتة ميراج لكن للأسف وهو نازل مطار فايد يستشهد بسبب حفرة موجودة في ممر الهبوط لو تفتكر قنابل اللي حكينا قصتها من شوية لكن المفارقة هنا أن حتى أستشهاده ما كانش بسبب أن طيار إسرائيلي ضربه ولا حاجة وده أكبر دليل على كفاءة الطيار المصري اللي قدر يشتبك بأقل الإمكانيات ضد أحدث الطيارات وقتها ويوقعها وهو ده اللي قاله اللواء حسني مبارك في مذكراته لما قال أن القادة الإسرائيلي غلطوا لما ركزوا على الطيارات والممرات وسابوا الطيارين المصريين طيب كان فيه طيارين مصريين تانيين قدروا يعملوا حاجة ولا الموضوع خلص على شلش وسليم؟
بطولات الرائد طيار مدحت المليجي
طبعا فيه خد عندك الرائد طيار مدحت المليجي اللي طلع بطيارة السخاوي ونفذ أكتر من طلعة يوم خمسة يونيو نفس يوم وكمل باقي الطلعات تاني يوم ستة يونيو لكن الطيار مدحت المليجي كان مختلف عن اللي سبقوه ليه? لأنه نقل مسرح العمليات لعمق إسرائيل دخل بطيارته المجال الجوي الاسرائيلي وضرب مطار هناك بطيارتين كانوا واقفين على الأرض مش بس كده ده قدر يهرب من الطيارات اللي طلعت تعترضه لحد ما وصل قاعدته الجوية في مطار فايد لكن للأسف برضه قبل ما ينزل يخلص وقود طيارته وتقع فيستشهد ويقابل وجه كريم بعد ما أثبت مش بس لقادة الجيش الإسرائيلي أنه قادر يطولهم رغم تفوقهم الجوي لكن الأهم أنه أثبت للمصريين والعالم كله أن النكسة كانت نكسة قرارات القادة مش ضعف العسكري المصري أبدا خد غيره
شجاعة الرائد الطيار حشمت وزميله الملازم أول طيار سعد
الرائد الطيار حشمت وزميله الملازم أول طيار سعد اللي اشتبكوا بطيارتين ميكس تسعتاشر مع دورية إسرائيلية كاملة فيها كم طيارة الدورية دي? اتناشر طيارة ميراج والمعركة دي كانت يوم تمانية يونيو قرب مطار المليز طيب كانت إيه النتيجة لما أتنين طيارين مصريين يشتبكوا مع ١٢ طيار اسرائيلي وركز على فرق الإمكانيات بين الطيارات المصرية والإسرائيلية كانت النتيجة ضرب اربع طيارات إسرائيلية من بين ١٢ وفضل حشمت وسعد يناوروا ويشتبكوا لحد ما وقود طياراتهم خلص اضطروا أنهم ينطوا من الطيارات بالمظلات وقدر الرائد حشمت أنه يرجع لقاعدته لكن الملازم أول سعد وقع في الأسر ويشاء المولى أن القوات الإسرائيلية اللي أسرته تقسم الأسرى اللي تم أسرهم في اليوم ده لمجموعتين المجموعة الأولى تم اعدامها قدام المجموعة التانية والمجموعة التانية أفرج عنها الجيش الإسرائيلي قولي لي علشان لما ترجع الجيش المصري تحكي عن قوة الجيش الإسرائيلي وازاي زمايلهم ماتوا قدام عينيهم ولسبب لا يعلمه إلا الله يتم اختيار الملازم أول سعد ضمن المجموعة التانية اللي رجعت وعلى طول يرجع قاعدته ويطير على طيارة تانية مع زمايله ولا كأنه حصل حاجة حضرتك هنا ممكن تقول تمام سلاح الجو المصري جامد لكن ده ما يمنعش أن باقي أفرع الجيش المصري ضعيفة بدليل أنها انضربت في سينا اللي اتاخدت مننا في سبعة وستين أقول لك كلامك غلط في غلط
شجاعة جنودنا
وده بقى بعيدا عن مذكرات مبارك هاضرب لك انا مثال واحد تحكيه لأي حد يقول لك
الجندي المصري ضعيف أحكي له قصة ١٨ عسكري المصريين اللي منعوا عشر دبابات إسرائيلية معهم قوات مشاة ميكانيكية في عربيات مجنزرة ودعم جوي من دخول بورفؤاد بعد أقل من شهر من نكسة سبعة وستين تمنتاشر عسكري بطولهم بفضل الله قدروا أنهم يحرقوا الدبابات الإسرائيلية ويوقعوا نص قوة المشاة اللي بتنفذ الهجوم قبل ما النص التاني يهرب في الدبابات اللي لسة شغالة لكن هنا برضه سؤال لما الطيارين المصريين والعساكر المصريين جامدين اوي كده انضربوا ازاي في خمسة يونيو واتاخدت منهم أرضهم؟ أقول لك انا لأنهم أصلا ما حاربوش ويقول لك اللواء حسني مبارك في مذكراته أن الطيارات المصرية ما كانش متوفر لها دوشم بتحميها والعساكر المصريين اللي راحوا سيناء كانوا متمركزين في أوضاع هجومية مش دفاعية
رأفت الهجان بلغ بميعاد الهجوم
الخطأ كان عند صانع القرار اللي وصلته معلومة
من الجاسوس رأفت الهجان بان اسرائيل هتضرب ومع ذلك ما اداش أوامر بتوجيه ضربة ولا حتى أستعد للضربة الإسرائيلية صانع القرار ما عملش أي حاجة غير أنه أدى أمر بالإنسحاب
طيب هي فين خطة الانسحاب؟
مكانش في الغطاء الجوي اللي هيأمن الانسحاب? ما فيش
هننسحب نروح فين؟ ما فيش الاسلحة التقيلة اللى ننسحب بها فكان طبيعي أن الطيران الإسرائيلي يطلع يتسلى على العساكر اللي بيجروا في قلب الصحرا مش عارفين هم رايحين فين
سؤال لمبارك
طيب لو حبينا نسأل إحنا بقى الرئيس الراحل مبارك سؤال وقلنا له مثلا مين اللي يتحمل خطأ نكسة سبعة وستين؟ هل صانع القرار لوحده ولا في حد تاني المفروض نحمله الخطأ
ده
الإجابة
فرد الرئيس مبارك في مذكراته وقال معلومة مهمة جدا قال أن بعض قادة أفرع القوات المسلحة لما قعدوا مع الرئيس جمال عبدالناصر قبل نكسة سبعة وستين قالوا له أنه حتى يا ريس لو إسرائيل بدأت الحرب فسلاح الجو المصري مش هيخسر غير عشرة في المية بس من قدرته وبالتالي كان رأي الرئيس جمال عبدالناصر وقتها أن العشرة في المية سهلة نتحمل الضربة الأولى ونرد بالتسعين في المية الباقيين خصوصا ودي معلومة مهمة وأن الإتحاد السوفيتي كان أتدخل وطلب من الرئيس جمال عبدالناصر أنه ما يبدأش الحرب
خداع اسرائيل لأتحاد السوفيتي ومصر
ووفقا لمذكرات مبارك فالرئيس عبدالناصر بعد ما قرر إغلاق المضايق في مايو سبعة وستين إسرائيل بدأت حملة دبلوماسية في المجتمع الدولي قال يعني عاوزين نحل سلمي فطلع وزير الخارجية الإسرائيلي على الرئيس الأمريكي وقال له إحنا مش عاوزين حرب مع مصر إحنا بس عاوزينكم كمجتمع دولي وتحديدا أنتم والأتحاد السوفيتي تقنعوا الرئيس جمال عبدالناصر يفتح المضايق تاني إحنا ناس بتوع سلام مش عاوزين حروب فقام الرئيس الأمريكي واخد الكلمتين دول وقايلهم للاتحاد السوفيتي يقوم الإتحاد السوفيتي يبعت رسالة لسفيره في القاهرة الساعة تلاتة الفجر بانه أطلع دلوقتي حالا صحي الرئيس جمال عبدالناصر وبلغه إن إسرائيل مش هتبدأ الحرب أطمن وما تبدأش أنت كمان الحرب ومن هنا كان قرار الرئيس جمال عبدالناصر بتأجيل الهجوم وأنه حتى لو إسرائيل بدأت الحرب هنستحمل يا سيدي الخساير العشرة في المية اللي قال عليها قادة الجيش المصري ونرد الضربة بالتسعين في المية الباقية
مفاجاءة الهجوم الى مكنش حد متوقعها
لكن في خمسة يونيو تفاجئ إسرائيل مصر والأردن وسوريا بضربة جوية ٥٨٤ طيارة ٢٤٦ طيارة مقاتلة و٢٠٠ طيارة تدريب تم تسليحهم ٥١ طيارة نقل عسكرية٥١ طيارة هليكوبتر مقاتلة عدد ضخم جدا من الطيارات خصوصا لما تعرف أن الجيش المصري أنتصر في حرب أكتوير ب٢٢٠طيارة بس من الآخر
كده وزي ما مبارك قال في مذكراته
إسرائيل لعبتها صح نيمت مصر والعالم كله وأقنعتهم أنها دولة بتاعة سلام مش بتاعة مشاكل بالظبط زي ما عملت بريطانيا وفرنسا قبل العدوان الثلاثي على مصر قعدوا يفاوضوا يمين وشمال طب بس مصالحنا! طب بس المجتمع الدولي طب بس نتفق على حل وسط وهوب صحي المصريين على عدوان ستة وخمسين واللي ساعد إسرائيل في النجاح
ده هو قادة الجيش المصري نفسهم اللي أوهموا نفسهم أنهم أقوى من عدوهم لدرجة أنهم ما أهتموش يواجهوه بأي خطة حقيقية لكن
أخطاء صانع القرار
الغريب بقى في مذكرات مبارك أنه أكتر من مرة اعتمد صانع القرار وقتها على اهل الثقة أكتر من أهل الخبرة اللي هو نفس الخطأ اللي أرتكبه الرئيس مبارك نفسه وخلال سنين حكمه هي مجموعة واحدة كانت محيطة بالرئيس مبارك من يوم ما مسك الحكم لحد ما سابه واللي من بينهم طبعا صفوت الشريف وفتحي سرور وزكريا عزمي وغيرهم لكن خلينا دلوقتي في اللواء حسني مبارك قائد القوات الجوية ومذكراته اللي بيحكي فيها أسرار النكسة وأسرار النصر إيه اللي حصل بعد كده وأزاي قدر اللواء حسني مبارك يخ